गाउँपालिकाको निर्णय: किसानको अनुदान अब विद्यालयको दिवा खाजामा

दोलखा । गौरीशंकर गाउँपालिकाले कृषि तथा पशुपालन अनुदानलाई विद्यालयका बालबालिकाको पोषणसँग जोड्ने नयाँ नीति लागू गरेको छ। अब स्थानीय किसान तथा कृषि–पशुपालन फर्मले पाउने अनुदानको २ प्रतिशत बराबरको सामग्री अनिवार्य रूपमा विद्यालयको दिवा खाजाका लागि उपलब्ध गराउनुपर्नेछ। अनुदानको सो २ प्रतिशत नै अनुदान रकम भित्र समायोजन हुने भएकाले कृषकलाई अतिरिक्त आर्थिक भार नपर्ने गरी कार्यक्रम कार्यान्वयन गरिएको पालिकाले जनाएको छ।

यो योजना वडा नं. ४ झ्याकुबाट सुरु भई हाल गाउँपालिकाका सबै वडामा विस्तार भइसकेको छ। नीतिअन्तर्गत चुनडाँडा चौँरीपालन फर्मले मानेडाँडा माध्यमिक विद्यालयलाई चार हजार चार सय रुपैयाँ बराबरको घिउ र छुर्पी उपलब्ध गराएको छ। त्यस्तै, किसान डोपछिरि शेर्पाले गोर्पाङ आधारभूत विद्यालयलाई चार हजार रुपैयाँ बराबरको दूध र छुर्पी बुझाएका छन्।

अनुदान भुक्तानी प्रक्रियालाई व्यवस्थित र पारदर्शी बनाउन पालिकाले किसानले विद्यालयमा सामग्री बुझाएको प्रमाण पेस गरेपछि मात्र भुक्तानी दिने व्यवस्था गरेको छ।

गाउँपालिकाका प्रमुख प्रशासकीय अधिकृत रिजेश उपरकोटिका अनुसार, यो नीतिले विद्यालयका बालबालिकाले दैनिक पाउने दिवा खाजामा ताजा र पोषिलो सामग्री सुनिश्चित गर्नुका साथै स्थानीय उत्पादनलाई गाउँमै स्थायी बजार निर्माण गर्ने उद्देश्य लिएको छ।