एमाले परित्याग गरी ४० नेता–कार्यकर्ता ‘नेपाली कम्युनिस्ट पार्टी’मा प्रवेश, प्रचण्डले गरे स्वागत

काठमाडौँ । नेकपा (एमाले) परित्याग गरी ४० जना नेता तथा कार्यकर्ताहरू एकैसाथ नेपाली कम्युनिस्ट पार्टीमा प्रवेश गरेका छन् । नेपाल मुक्ति समाजका अगुवाहरू तथा विभिन्न जनवर्गीय संगठनका पदाधिकारी र सदस्यसहितको टोली मंगलबार औपचारिक रूपमा सो पार्टीमा प्रवेश गरेको हो ।

​पार्टी केन्द्रीय कार्यालयमा आयोजित विशेष कार्यक्रमका बीच पुष्पकमल दाहाल 'प्रचण्ड' ले नवप्रवेशीहरूलाई खादा लगाएर पार्टीमा स्वागत गरे । कार्यक्रममा राष्ट्रिय सभा सदस्य घनश्याम रिजाल लगायतका नेताहरूको समेत उपस्थिति रहेको थियो ।

​एमालेभित्र अन्योल र विचारगत अस्पष्टताको आरोप

​पार्टी प्रवेश गर्ने नेताहरूले एमाले छाड्नुको मुख्य कारण आन्तरिक अन्योल र विचारगत असमानता रहेको बताएका छन् । उनीहरूले एमालेभित्र कमजोर संगठनात्मक व्यवहार र नीतिगत अस्पष्टता बढेका कारण नयाँ राजनीतिक थलो रोज्नुपर्ने अवस्था आएको उल्लेख गरे ।

​अब नेपाली कम्युनिस्ट पार्टीको मार्गदर्शनमा गोलबन्द हुँदै जनताको पक्षमा सक्रियतापूर्वक काम गर्ने प्रतिबद्धता समेत उनीहरूले जाहेर गरेका छन् ।

​पार्टी सुदृढ हुने विश्वास

​नवप्रवेशीहरूलाई स्वागत गर्दै अध्यक्ष प्रचण्डले नयाँ कार्यकर्ताको आगमनले पार्टीलाई अझ सुदृढ, गतिशील र जनमुखी बनाउन महत्वपूर्ण भूमिका खेल्ने विश्वास व्यक्त गरे । उनले यो ध्रुवीकरणले आगामी दिनमा कम्युनिस्ट आन्दोलनलाई नयाँ उचाइमा पुर्‍याउने दाबी समेत गरे ।

​एमालेका विभिन्न तहका जिम्मेवार नेताहरूले एकैसाथ पार्टी छाडेर नेपाली कम्युनिस्ट पार्टी रोज्नुलाई राजनीतिक वृत्तमा चासोका साथ हेरिएको छ ।