दोलखाले विशेषज्ञ डाक्टर त जन्मायो, तर के चरिकोट अस्पतालले उनीहरूलाई टिकाउन सक्ला?

दोलखा। दोलखाको चरिकोट (पशुपति चौलागाईं) अस्पताल संघीयतापछि प्रादेशिक अस्पतालमा रूपान्तरण भयो। तर, अवस्था बदलिन सकेन। विशेषज्ञ चिकित्सकको अभावका कारण वर्षौँदेखि धेरै बिरामी सामान्यदेखि जटिल उपचारका लागि काठमाडौं र अन्य ठूला अस्पताल धाउन बाध्य छन्। अस्पतालमा पूर्वाधार र प्रविधि थपिए पनि विशेषज्ञ चिकित्सकको कमीले स्वास्थ्य सेवा प्रभावित हुँदै आएको छ। सामान्यभन्दा जटिल समस्या देखिनेबित्तिकै काठमाडौँ रिफर गर्नु यहाँका नागरिकको बाध्यता बनेको छ।

तर, यही निराशाबीच अहिले आशाको नयाँ किरण देखिएको छ। दोलखाकै माटोमा जन्मी-हुर्की, सरकारी छात्रवृत्ति र आफ्नै मेहनतले विशेषज्ञता (MD/MS) हासिल गरेका युवा चिकित्सकहरूको एउटा टोली अब यही प्रादेशिक अस्पतालमा आउन तयार भएका  छन् ।

स्थानीय भूगोल, समाज, मानिसहरूको जीवनस्तर र जनस्वास्थ्यका समस्यालाई नजिकबाट बुझेका यी चिकित्सकहरू विशेषज्ञता हासिल गरेपछि आफ्नै जिल्लामा फर्किएर सेवा गर्न उत्सुक देखिएका छन्। आफ्नै जिल्लाका छोराछोरी डाक्टर बनेर उपचार गर्न आउने खबरले स्थानीय जनतामा पनि ठूलो उत्साह जगाएको छ। जिल्लामै विशेषज्ञ सेवा पाउने हो भने काठमाडौं जाँदा लाग्ने यातायात, बसोबास खर्च र मानसिक तनावबाट मुक्ति पाइने आशा स्थानीयले गरेका छन्।

पछिल्ला वर्षहरूमा दोलखामा स्वास्थ्य पूर्वाधारमा उल्लेखनीय लगानी भई प्रादेशिक अस्पताल चरिकोटको स्वरूप फेरिए पनि ती आधुनिक भवन र उपकरणहरू विशेषज्ञ जनशक्तिको अभावमा प्रभावकारी रूपमा प्रयोग हुन सकेका छैनन्। दोलखाकै दक्ष चिकित्सकलाई जिल्लामै उपयोग गर्न सके स्वास्थ्य सेवाको गुणस्तर सुधार हुनुका साथै काठमाडौं रिफर हुने बिरामीको संख्या पनि घट्ने अपेक्षा गरिएको छ, जसले विपन्न परिवारको आर्थिक भार कम गर्नेछ।

अब सबैको नजर प्रादेशिक अस्पताल चरिकोट र सम्बन्धित सरकारी निकायतर्फ केन्द्रित भएको छ। राज्यले आफ्नै जिल्लाका दक्ष जनशक्तिलाई प्राथमिकता दिएर जिल्लामै रोक्ने वातावरण बनाउने कि नबनाउने भन्ने प्रश्न उठेको छ।

उनीहरूलाई जिल्लामै सेवा गर्ने अवसर उपलब्ध गराउन आवश्यक व्यवस्थापन, सुरक्षित कार्य वातावरण, आवश्यक स्रोत-साधन तथा नीतिगत सहजीकरण आवश्यक देखिन्छ। सरकारी छात्रवृत्तिअन्तर्गत करार सेवामा देशको जुनसुकै स्थानमा काम गर्न सक्ने व्यवस्था रहे पनि दोलखाकै चिकित्सकहरूले आफ्नै जिल्लामा सेवा गर्ने इच्छा व्यक्त गरेका छन्। त्यसैले सम्बन्धित निकायले उपयुक्त व्यवस्थापन गर्न सके दोलखावासीले आफ्नै जिल्लामै गुणस्तरीय विशेषज्ञ स्वास्थ्य सेवा पाउने अपेक्षा गर्न सकिन्छ।

दोलखाले दक्ष जनशक्ति उत्पादन गरेर आफ्नो तर्फबाट भूमिका पूरा गरेको छ। अब पालो सम्बन्धित निकायको हो। दोलखाका यी विशेषज्ञ चिकित्सकहरू आफ्नै जिल्लाको स्वास्थ्य सेवाको बलियो आधार बन्ने हुन् कि फेरि पनि जिल्लाबासीले विशेषज्ञ उपचारका लागि काठमाडौंकै बाटो समाउनुपर्ने पुरानै अवस्था दोहोरिने हो भन्ने कुरा आगामी दिनमा सरकारको निर्णय र इच्छाशक्तिले निर्धारण गर्नेछ।