बुद्ध जयन्ती र मजदुर दिवसमा पनि चरिकोटका निजी विद्यालय खुल्ला, सामाजिक संवेदनशीलता हराएको भन्दै आलोचना

दोलखा। बुद्ध जयन्ती, मजदुर दिवस र उधौली–उभौली जस्ता महत्वपूर्ण राष्ट्रिय तथा सांस्कृतिक पर्वका दिन पनि दोलखाको चरिकोटका अधिकांश निजी विद्यालयहरू सञ्चालनमा आएका छन्। सदरमुकाम चरिकोटमा रहेका १२ वटा निजी विद्यालयमध्ये एपेक्स स्कुल, राइजिङ स्टार र मोडेर्न नेपाल बाहेकका अन्य सबै विद्यालयले बिदा नगरी पठनपाठन सुचारु राखेका हुन्। देशभर सार्वजनिक बिदा भइरहेका बेला विद्यालय सञ्चालन गरिएको भन्दै स्थानीय समुदाय र अभिभावकहरूले यसलाई ‘सामाजिक संवेदनशीलतामाथिको प्रहार’ भन्दै आपत्ति जनाएका छन्।

​शिक्षा भनेको केवल किताबी ज्ञान मात्र नभई समाजको संस्कार, संस्कृति र श्रमको सम्मान सिकाउने माध्यम पनि हो। तर, महत्वपूर्ण चाडपर्व र दिवसहरूमा समेत विद्यार्थीहरूलाई विद्यालयमा उपस्थित गराउनाले शैक्षिक संस्थाहरूले सामाजिक जिम्मेवारी भन्दा पनि व्यावसायिक नाफालाई मात्र केन्द्रमा राखेको त होइन भन्ने प्रश्न उठेको छ। संस्कार र संस्कृति सिकाउने केन्द्रका रूपमा रहेका विद्यालयहरूले नै यस्ता विशेष अवसरहरूको अपमान गर्दा विद्यार्थीहरूमा आफ्नो परम्पराप्रति कस्तो प्रभाव पर्ला भन्नेमा सरोकारवालाहरूले चिन्ता व्यक्त गरेका छन्।

​चरिकोटका केही विद्यालयहरूले बिदा दिएर सामाजिक मूल्य र मान्यताको सम्मान गरे पनि, अन्य विद्यालयहरूको यो कदमले स्थानीय प्रशासन र सम्बन्धित निकायको नियमनमाथि समेत प्रश्न खडा गरिदिएको छ। शिक्षा क्षेत्रमा गुणस्तर जत्तिकै सामाजिक र सांस्कृतिक सम्मान पनि आवश्यक पर्ने भन्दै यस्ता गतिविधिप्रति सम्बन्धित पक्षको गम्भीर ध्यानाकर्षण हुनुपर्ने देखिएको छ।