नीलकण्ठेश्वर माविको ६४औँ वार्षिकोत्सव सम्पन्न, शैक्षिक सुधारमा गाउँपालिकाको जोड

दोलखा । दोलखाको गौरीशंकर गाउँपालिकामा रहेको नीलकण्ठेश्वर माध्यमिक विद्यालयले आफ्नो ६४औँ वार्षिक उत्सव तथा ३४औँ अभिभावक दिवस भव्य रूपमा मनाएको छ।

विद्यालय व्यवस्थापन समितिका अध्यक्ष बसन्त कार्कीको अध्यक्षतामा भएको सो कार्यक्रममा विद्यार्थी, अभिभावक र स्थानीय जनप्रतिनिधिहरूको ठुलो उपस्थिति थियो।

कार्यक्रमका प्रमुख अतिथि एवं गौरीशंकर गाउँपालिकाका अध्यक्ष विश्वास कार्कीले सामुदायिक विद्यालयको शैक्षिक अवस्था सुधार्न गाउँपालिकाले विशेष पहल गर्ने बताए। उनले विद्यार्थीहरूको भविष्य राम्रो बनाउन शिक्षक र अभिभावकको भूमिका उत्तिकै महत्त्वपूर्ण हुने भन्दै विद्यालयको विकासमा बजेटको कमी हुन नदिने प्रतिबद्धता जनाए।

​त्यस्तै, कार्यक्रमकी विशेष अतिथि एवं गाउँपालिकाकी उपाध्यक्ष उमा लुङ्गेली मगर शेर्पाले बालबालिकालाई गुणस्तरीय शिक्षा दिनु सबैको दायित्व भएको बताइन्। उनले गाउँपालिकाले शिक्षा र बालविकासको क्षेत्रलाई प्राथमिकतामा राखेर काम गरिरहेको जानकारी दिइन्।

कार्यक्रममा वडाका जनप्रतिनिधिहरूले पनि विद्यालयको ऐतिहासिक गरिमा जोगाउँदै आगामी दिनमा अझ राम्रो नतिजा ल्याउन शुभकामना दिए। ६ दशकभन्दा लामो इतिहास बोकेको यस विद्यालयले वार्षिकोत्सवको अवसरमा उत्कृष्ट विद्यार्थी र योगदान पुर्‍याउने व्यक्तिहरूलाई सम्मान समेत गरेको थियो।

​वार्षिकोत्सवको अवसरमा विद्यार्थीहरूले विभिन्न सांस्कृतिक झाँकी, गीत र नृत्यहरू प्रस्तुत गरेर कार्यक्रमलाई थप रोचक बनाएका थिए। अभिभावकहरूले विद्यालयको प्रगतिमा खुसी व्यक्त गर्दै शैक्षिक वातावरण अझै राम्रो बनाउन सुझाव दिए।

कार्यक्रमको समापन गर्दै अध्यक्ष बसन्त कार्कीले सबैको साथ र सहयोगले नै विद्यालय यो अवस्थामा आइपुगेको बताए। उनले कार्यक्रम सफल बनाउन सहयोग गर्ने सबै अतिथि, अभिभावक, शिक्षक र विद्यार्थीहरूलाई धन्यवाद दिए।