बिगुको 'आवासीय कक्षा'ले ल्यायो नतिजामा सुधार: १८ बाट ७६ प्रतिशत पुग्यो उत्तीर्ण दर

दोलखा । गत वर्षको शैक्षिक इतिहासमै कमजोर नतिजा आएपछि 'गम्भीर' बनेको दोलखाको बिगु गाउँपालिकाले यस वर्ष आधारभूत तह (कक्षा ८) को परीक्षामा चामत्कारिक सुधार गरेको छ । अघिल्लो शैक्षिक सत्र २०८१ मा जम्मा १८ प्रतिशत विद्यार्थी मात्र उत्तीर्ण भएपछि आलोचना खेपेको पालिकाले यस वर्ष ७६.४ प्रतिशत नतिजा निकाल्दै शिक्षामा नयाँ मानक स्थापित गरेको हो ।

​सुधारको कडी: आवासीय अतिरिक्त कक्षा

गत वर्षको नतिजा बिग्रिएपछि गाउँपालिका अध्यक्ष सन्जिव ओलीको सक्रियतामा पालिकाले विशेष योजना अघि सारेको थियो । विद्यार्थीको जग कमजोर भएको निष्कर्ष निकाल्दै पालिकाले यस वर्ष परीक्षार्थीहरूका लागि आवाससहितको अतिरिक्त (Extra) कक्षा सञ्चालन गरेको थियो । घरको वातावरण र अन्य घरायसी कामले पढाइमा बाधा नपुगोस् भन्नका लागि विद्यार्थीलाई विद्यालयमै राखेर पढाउने व्यवस्था मिलाइएको थियो ।

​"अघिल्लो वर्षको नतिजाले हामीलाई ठूलो पाठ सिकाएको थियो," पालिका स्रोत भन्छ, "त्यसैले यस वर्ष विद्यार्थीलाई विद्यालयमै आवासको सुविधा र अतिरिक्त शिक्षकहरूका माध्यमबाट विशेष कक्षा सञ्चालन गरियो, जसको सुखद परिणाम आज देखिएको छ ।"

​तीन विद्यालयको 'क्लीन स्वीप'

शुक्रबार सार्वजनिक नतिजा अनुसार पालिकाभित्रका १२ विद्यालयमध्ये तीनवटाले शतप्रतिशत सफलता हात पारेका छन् । बिगु–२ को देवलिङ्गेश्वर मावि, बिगु–५ को हिमखण्ड भुबनेश्वरी आवि र बिगु–८ को कालिञ्चोक माविबाट सहभागी सबै विद्यार्थी उत्तीर्ण भएका छन् ।

​पालिकाभरिबाट कूल २५४ परीक्षार्थी सामेल भएकोमा १९४ जनाले सफलता प्राप्त गरेका छन् । योसँगै समग्र उत्तीर्ण प्रतिशत ७६.४ पुगेको छ । यद्यपि, आलम्पुको थम्पु मावि (१९.२%) र चिलङ्खाको हिमालय मावि (३७.५%) मा भने अझै सुधारको खाँचो देखिएको छ ।

​वैशाख १३ मा ग्रेड वृद्धि परीक्षा

नतिजामा सफल हुन नसकेका ६० जना विद्यार्थीका लागि गाउँपालिकाले पुनः अवसर दिने भएको छ । आगामी २०८३ वैशाख १३ गतेदेखि गाउँपालिकाको सभाहलमा ग्रेड वृद्धि (पुरक) परीक्षा सञ्चालन हुने निमित्त प्रमुख प्रशासकीय अधिकृत गणेश श्रेष्ठले जानकारी दिए ।

​विद्यार्थीले आफ्नो व्यक्तिगत नतिजा सम्बन्धित विद्यालयको IEMIS बाट लेजर प्रिन्ट गरी हेर्न सक्ने व्यवस्था मिलाइएको अधिकृत श्रेष्ठले बताए । पालिकाले अपनाएको यो 'आवासीय मोडल' को सफलतापछि अब अन्य क्षेत्रमा पनि यसलाई कसरी निरन्तरता दिने भन्नेबारे छलफल सुरु भएको छ ।