बैतेश्वरमा महिला स्वास्थ्य स्वयंसेविकाको ४ दिने तालिम सम्पन्न

दोलखा । बैतेश्वर गाउँपालिकामा महिला सामुदायिक स्वास्थ्य स्वयंसेविकाहरूका लागि ४ दिने पुनर्ताजगी तालिम सम्पन्न भएको छ।

जनस्वास्थ्य कार्यालय दोलखाको आयोजना तथा बैतेश्वर गाउँपालिका स्वास्थ्य शाखाको सहकार्यमा सञ्चालन भएको तालिम जेठ १२ गतेदेखि १५ गतेसम्म चलेको थियो। तालिममा गाउँपालिकाका विभिन्न वडाका २६ जना महिला स्वास्थ्य स्वयंसेविकाको सहभागिता रहेको थियो।

समापन कार्यक्रममा वडा नम्बर २ का अध्यक्ष श्यामकुमार तामाङको अध्यक्षता रहेको थियो। कार्यक्रममा जनस्वास्थ्य कार्यालय दोलखाका प्रमुख डिलेन्द्र बुढामगर, जनस्वास्थ्य अधिकृत रमेश श्रेष्ठ, जनस्वास्थ्य निरीक्षक प्रकाश घिमिरे, स्वास्थ्य शाखा प्रमुख बमबहादुर तामाङ र उपप्रमुख अमित यादव लगायतको उपस्थिति थियो।

कार्यक्रममा बोल्दै जनस्वास्थ्य अधिकृत रमेश श्रेष्ठले महिला स्वास्थ्य स्वयंसेविकाहरू गाउँ-समाजको स्वास्थ्य सेवामा महत्वपूर्ण भूमिका खेलिरहेको बताए। उनले यस्ता तालिमले स्वयंसेविकाको ज्ञान र सीप बढाउन मद्दत पुग्ने बताए।

तालिम सञ्चालनमा सहयोग गर्ने प्रशिक्षक सम्झना रिमाल र सन्दीपकुमार चौधरीलाई धन्यवाद दिइएको थियो। साथै, तालिमका लागि हल उपलब्ध गराएको जनज्योति माध्यमिक विद्यालयलाई पनि आभार व्यक्त गरिएको थियो।