मेलुङ बन्यो दोलखाको दोस्रो पूर्णखोप सुनिश्चित पालिका

दोलखा । दोलखाको मेलुङ गाउँपालिका 'पूर्णखोप सुनिश्चित' पालिका घोषणा भएको छ । सरकारको राष्ट्रिय खोप तालिकाअनुसार १५ देखि ५९ महिनासम्मका सबै बालबालिकाले सबै प्रकारका खोप पाएको सुनिश्चित भएपछि गाउँपालिकालाई औपचारिक रूपमा घोषणा गरिएको हो ।

​आर्थिक वर्ष २०८२/८३ को खोप सुदृढीकरण अभियान सफल भएसँगै गाउँपालिकाले यो सफलता पाएको स्वास्थ्य शाखा प्रमुख हरिराम चापागाईले जानकारी दिए । उनका अनुसार पालिकाका ७ वटै वडाका कुल ९८ जना बालबालिकाले बिसिजी, पेन्टाभ्यालेन्ट, पोलियो, दादुरा–रुबेला र जापानी इन्सेफलाइटिस लगायतका सबै आधारभूत खोप पूरा गरेका छन् ।

​गाउँपालिका अध्यक्ष हिरा कुमार तामाङको अध्यक्षतामा भएको घोषणा कार्यक्रममा जिल्ला समन्वय समिति प्रमुख बर्जुराम घतानीले स्वास्थ्यकर्मी र स्वयंसेविकाहरूको मिहिनेतले मेलुङले ठूलो सफलता हासिल गरेको बताए । उनले यसलाई आगामी दिनमा पनि निरन्तरता दिनुपर्नेमा जोड दिए ।

​दोलखामा यसअघि गौरीशंकर गाउँपालिका मात्रै पूर्णखोप घोषणा भएको थियो । मेलुङ यो उपलब्धि हासिल गर्ने जिल्लाको दोस्रो पालिका बनेको छ । पूर्णखोप घोषणाले समुदायमा बालमृत्युदर घटाउन र बालबालिकालाई विभिन्न सरुवा रोगबाट बचाउन महत्त्वपूर्ण भूमिका खेल्ने विश्वास लिइएको छ ।